1 Chronicles 9

Babulono amo e lou taudia

1Taunabunai Israel idoinai ladadia e tore, edia uru ta ta ai; ini na Israel Pavapavadia Bukana ai e hetore. Iuda taudia na e abidia oho, Babulono ai e hanohodia, asie momokani dainai. 2Edia tano ai bona edia hanua ai e noho henidia lou matama taudia na Israel taudia, hahelaḡa taudia, Levi taudia, bona dubu ena hesiai taudia. 3Iuda bona Beniamina bona Efraim bona Manase taudia haida na Ierusalem ai e nohova. 4Ta be Utai, Amihud natuna; Amihud na Omri natuna, Omri na Imri natuna, Imri na Bani natuna; Bani na Perese Iuda garana ta. 5Bona Silono taudia: Asaia, tau-guna, mai natuna hahidaosi ida. 6Sera garana: Ieuele bona varavara verina, tatau sinahu-tauratoi taurahanita-ahui. 7Bona Beniamina taudia: Salu (ia na Mesulama natuna, Mesulama na Hodavia natuna, Hodavia na Hasenua natuna); 8bona Ibneia Ierohama; bona Elaha (ia na Usisi natuna, Usisi na Mikri natuna); bona Mesulama (ia na Sefatia natuna, Sefatia na Reuele natuna, Reuele na Ibnia natuna); 9bona varavaradia, edia uru ta ta ai, tatau sinahutaurahanita imahui tauratoi. Ini iboudiai na iduhu kwaradia, ta ta ena iduhu ena iduhu ai.

10Hahelaḡa taudia: Iedaia, Iehoiaribi, Iakin, 11bona Asaria (ia na Hilkia natuna, Hilkia na Mesulama natuna, Mesulama na Sadok natuna, Sadok na Meraioto natuna, Meraioto na Ahitubu natuna - ia na Dirava ena dubu itataona tau badana); 12bona Adaia (ia na Ierohama natuna, Ierohama na Pasahuru natuna, Pasahuru na Malkia natuna); bona Maasai (ia na Adiele natuna, Adiele na Iahasera natuna, Iahasera na Mesulama natuna, Mesulama na Mesilemiti natuna, Mesilemiti na Imere natuna); 13bona varavaradia, edia iduhu kwaradia, tatau daha-ta sinahu-hitu tauratoi-ahui, Dirava ena dubu ḡaukaradia mai dibadia herea taudia.

14Levi taudia: Semaia (ia na Hasub natuna, Hasub na Asarikama natuna, Asarikama na Hasabia natuna, Merari garana taudia); 15bona Bakabakara; bona Herese; bona Galala; bona Matania (ia na Mika natuna, Mika na Sikri natuna, Sikri na Asaf natuna); 16bona Obadia (ia na Semaia natuna, Semaia na Galala natuna, Galala na Iedutunu natuna); bona Berekia (ia na Asa natuna, Asa na Elkana natuna; hari Elkana na Netofa taudia edia hanua ai e nohova).

17Ikoukou igimadia taudia bini: Salumu, Akubu, Talmon, Ahiman, mai varavaradia ida. Ikwaradia na Salumu. 18Guna idia na hanua pavapavana ena ikoukou e gimaiava, mairiveina kahana ai. Levi taudia edia taruha ikoukouna igimana taudia bunu. 19Salumu (ia na Kore natuna, Kore na Ebiasafa natuna, Ebiasafa na Kora natuna) bona iena iduhu, Kora iduhuna, taudia na dubu ḡaukaradia e biagudia bona kalaga raka-vareaina e gimaia, senedia ese Iehova ena taruha e biaguava bona raka-vareaina e gimaiava heḡereḡerena. 20Nega gunadia ai, Fineha Eleasara ese e biagudia, bona Iehova na ia ida. 21Sekaria Meselemia na ikoukou igimana tauna, hebou kalagana raka-vareaina ai. 22Ini iboudiai, raka-vareai ikoukoudia igimadia dainai e duanaidia taudia, na sinahu-rua gwauta-rua; edia uru ta ta ai ladadia e tore, edia hanua heḡereḡeredia ai. David bona mata-hanai tauna Samuel ese e haginidia, abidadama dagina ai. 23Taunabunai, idia bona natudia na Iehova ena dubu, kalaga dubuna, ikoukoudia ibiagudia bona igimadia taudia. 24Ikoukou igimadia taudia na kaha haniosi ai, laurabada bona lahara, mirigini bona tahodiho, e gimadiava; 25bona varavaradia hanua ai na taravadia e atu, dina hitu hitu amo baema, edia nega edia nega ai, bae bamodia totona. 26Badina be ikoukou igimadia taudia badadia hahaniosi na Levi taudia; idia ese Dirava ena dubu daiutudia bona kohudia e nariva. 27Idia na Dirava ena dubu heḡeḡemadai e nohova, badina be edia ḡaukara korikori na bae gimaia, bona daba daba iboudiai bae kehoa.

28Idia haida ese tomadiho ai e ḡaukaralaiva ḡau helagadia e nariva; edia ḡaukara be e atodia vareai bona e abidia lasi negadia ai bae hagaudia. 29Ma haida edia ḡaukara na dubu kohudia bona ḡau helaḡadia iboudiai, bona flaoa namo-hereana, bona vine ranuna, bona dehoro, bona muramura mai bonadia, bona aniani mamidia ihanamodia muramuradia, inaridia. 30Ma haida, hahelaḡa taudia natudia, ese aniani mamidia ihanamodia muramuradia e bulo hegaeḡaeva. 31Matitia, Levi tauna ta, Salumu tau Kora natuna roboana, ese ataga igabudia e nariava. 32Bona varavaradia haida, Kohat iduhuna taudia, ese flaoa helaḡana igabuna e nariava, dina helagadia iboudiai e heḡaeḡaelaiava.

33Unu na ane-abi taudia, Levi iduhudia ikwaradia taudia, dubu daiutudia ai e nohova, bona asi edia ḡaukara idauna ta, badina be dina hanuaboi e gaukarava. 34Levi taudia edia iduhu kwaradia bunu; idia na hegunalai taudia, edia uru ta ta ai; idia danu Ierusalem ai e nohova.

Saulo senena bona garana

35Ieiele, Gibeon tamana, na Gibeon ai e nohova; ia adavana ladana na Maaka. 36Natuna roboana na Abdon; ia murinai Suru, Kisa, Baal, Nere, Nadab, 37Gedoro, Ahio, Sekaria, Mikloto. 38Mikloto na Simeama tamana. Idia na varavaradia italaidia ai e nohova Ierusalem ai, tadikakadia ida. 39Nere na Kisa tamana, Kisa na Saulo tamana, Saulo na Ionatan bona Malkisua bona Abinadab bona Esebaal tamadia. 40Ionatan natuna na Merib-baal; Merib-baal na Mika tamana. 41Mika natuna: Pitono, Melek, Tarea, Ahasa. 42Ahasa na Iara tamana; Iara na Alemete bona Asamavete bona Simin tamadia; Simiri na Mosa tamana; 43Mosa na Binea tamana; Binea natuna na Refaia; Refaia natuna na Eleasa; Eleasa natuna na Asele. 44Asele natuna na tauratoi, ladadia bini: Asarikama, Bokeru, Ismael, Searia, Obadia, Hanana. Asele natuna bunu.